Ukraina Prezidentiniñ Qırım MC Daimiy Temsilcisi Anton Korınevıç Temsilcilikniñ faaliyetindeki esas yönelişlerni taqdim etti

Bügün, 2019 senesi boş ay (noyabr) 13 künü Ukraina Prezidentiniñ Ofisinde Ukraina Prezidentiniñ Qırım Muhtar Cumhuriyetindeki Temsilciliginiñ yañı taqımı brifing keçirdi.

Brifing devamında Ukraina Prezidentiniñ Qırım MC Daimiy Temsilcisi Anton Korınevıç Temsilcilikniñ faaliyetindeki esas yönelişlerni taqdim etti: ” Strategik maqsatlarımız aqqında söz yersetsek, ilk nevbette men qanun yaratıcılıq yönelişindeki faaliyetimizni qayd eter edim. Bu, Temsilcilik aqqında Ukraina Qanunı ve mütenasip Prezident Fermanı boyunca bizim vekâletlerimizdir. Yani, biz kerçekten de Qırım ve qırımlılar içün kerek olğan qanun leyhalarını azırlağan bir organ olmağa tırışacaqmız. Bazı neticelerimiz bar. Olarnı kenişletmege ümüt etemiz. Elbette, biz qırımlılarnıñ aq-uquqlarını qorçalağan ve qırıımlılarğa nisbeten sözde diskriminatsion maddellerinden qaçınğan qanun leyhaları üzerinde çalışacaqmız”.

Anton Korınevıç Temsilcilik al-azırda ve şu cümleden vatandaşlıq meseleleri boyunca mütenasip qanun leyhalarını azırlağan bir-qaç iş gruppalarında iştiraq etkenini qayd etti.

Ekinci vazifesi olaraq Daimiy Temsilci haber siyasetini ve vaqtınca işğal etilgen topraqlarda yaşağan vatandaşlarnen alâqalarnı qayd etti. Çünki Qırım meselesini milliy matbuat vastalarında kötermek ve vaqtınca işğal etilgen topraqlarda eşitilmek pek müim.

”Bu meseleniñ daa bir müim tarafı bar – biz añlaymız ki, esli-başlı vatandaşlar Ukrainanı bile ve hatırlay, Ukrainanen bağ tutmaqtalar. Amma işğalniñ altıncı yılında Qırımda Ukraina ne olğanını, ana devlet ne olğanını bilmegen balalar öskenini de añlaymız”, – dep qayd etti o.

Üçünci vazifemiz, qırımlılarnıñ aq-uquqlarını qorçalav, tamır Qırım halqlarınıñ aq-uquqlarını ğayrıdan tiklev ve qorçalav, qırımtatar halqınıñ statusı boyunca qanun leyhalarını azırlav ve Ukraina Esas qanunına kirsetilecek deñişmelerni azırlavdır. Temsilcilik vaqtınca işğal etilgen Qırımda insan aqları saasındaki vaziyetni köz etmege ve Ukraina qıtasında Qırım yönelişinde çalışıp, vaqtınca işğal etilgen topraqlarda insan aqlarınıñ bozuluvlarını taqip etken uquq qorçalav organları ile işbirlikte bulunmağa devam etecek.