Rusiye imperialistik siyaseti ceetinden Şimaliy Qara deñiz boyu ve Qırım

2019 senesi qural ay (mayıs) 07 künü Qırım evinde ”Rusiye imperialistik siyaseti ceetinden Şimaliy Qara deñiz boyu ve Qırım: müstemlekecilik, ilhaq etüv, temsiliy ”şahsiyleştirüv”, 2014 senesi yüz bergen ilhaq etüvden evel ve soñraki devirlerde keçmişteki imperialistik şekillerini” aletke çevirüv” mevzusında Ukraina milliy hatıra institutı tarafından teşkil etilgen tögerek masa keçirildi.

Tebirde yuqarıda qayd etilgen İnstitutnıñ reberi Volodımır Vâtrovıç, Qırımtatar Milliy Meclisiniñ reisi, Ukraina halq deputatı Refat Çubarov, ”Umma” diniy musulman idaresiniñ müftisi Said İsmagilov, alimler, ekspertler ve Temslicilikniñ Kıyiv şeerindeki ofisiniñ hadimleri iştirak etti.

Tedbir iştirakçileri Rusiye çeşit tarihiy devirlerde Qırımğa ve onıñ tamır halqına qarşı yapqan tecavüziy areketlerniñ siyasiy, cemaat, içtimaiy, diniy ve medeniy hususiyetlerini talil etip, zemaneviy şaraitlerde Kremlniñ istilâcı-imperialistik siyasetine qarşılıq kösterüv tedbirlerni muzakere ettiler.

Tögerek masanı canlı yayında ”ATR” qırımtatar telekanalı ve başqa matbuat vastaları kösterdiler.