Ukrainanıñ sanktsıyalar boyunca siyasetiniñ semereligini arttıruv

2018 senesi arman (avgust) ayı 1 künü Ukraina Yuqarı Şurasınıñ insan aqları, milliy azınlıqlar ve milletlerara munasebetler meseleleri boyunca Komitetinde Ukraina Prezidentiniñ Qırım MC Daimiy Temsilcilsiniñ Birinci muavini İzet Gdanov ve Temsilcilikte halqara alâqalar hızmetiniñ hadimleri, ‘‘Ukraina vatandaşlarını siyasiy sebepten ve qanunsız şekilde taqip etüvge alâqaları olğan şahıslarğa qarşı sanktiyalarnı qullanuv saasında devlet siyasetini mükemmeleştirüv’’ mevzusında komitet diñlevleriniñ azırlanuvı boyunca iş gruppasınıñ oturışında iştirak ettiler.

Oturışta Ukraina Milliy bankınıñ, Ukraina havfsızlıq Hızmetiniñ, Ukraina adliye Nazirliginiñ, prokuraturanıñ ve cemaat teşlilâtlarnıñ vekilleri, parlament komitetiniñ hadimleri iştirak etti. İş gruppası Ukraina qanuniyetine köre sanktsiyalarnı işletüv tertibini mükemmeleştirüv meselesini, bu cümleden, tekliflerni yapa bilecek şahıslar cedveliniñ keñişletüvini ve tekliflerniñ baqıluv vaqıtınıñ belgilevini muzakere etti.

Bundan da ğayrı, sanktsıyalar boyunca siyasetni teşkil ve temin etken cemaat teşkilâtları ile devlet organları arasında ve bu cümleden sanktsıyalarnen bağlı deñişmelerni taqdim etken şahıslar ile işbirlikni quvetleştirüv meselesi de muzakere etildi.

İzet Gdanov qayd etkenine köre, Temsilcilik daimiy şekilde vaqtınca işğal etilgen Qırımda olıp keçken ceryanlarnı nezaret etip, vekâletli organlar adına saktsiyalarnı kirsetüv boyunca tekliflerni azırlay. Al-azırda Temsilcilik Qırımda ve Qırımdan Rusiye istilâsına qol tutqan şahıslarnı ve teşkilâtlarnı taqip etüvni mükemmeleştirecek teklifler üsünde çalışıp, kelecekte olarnı Ukraina Prezidentine taqdim etecektir.