İşğalcilerniñ ‘‘Qırım birdemligine’’ qarşı yañı cezalavları

2018 senesi ekim (oktâbr) ayı 27 künü ‘‘Qırım birdemliginiñ’’ Aqmescit şeerinde nevbetteki toplaşuvına RF içki işler Nazirligi ve federal havfsızlıq Hızmeti cezalav organlarınıñ vekilleri ücüm etip, abulqatlar Lilâ Gemecini ile Edem Semedlâyevni, em de ‘‘Qırım birdemliginiñ’’ yöneticisi Dilâver Memetovnı, aşıcırılıq ve terrorizm saalarında qanuniyetni bozmağa mümkün olmağanı aqqında tenbiyelediler.

Lilâ Gemeci ‘‘silâlılarnıñ’’ böyle areketlerini öz zenaatınen bağlağanını qayd etti, çünki olarnıñ maqsadı – aq-uquqlarnı qorçalav faaliyetine qarışmaqtır, abulqatlarğa basqı vastasınen ise basqı ‘‘Qırım birdemligine’’ de yapılmaqta. Qırımdaki qullanıcılarnıñ malümatına köre, ‘‘Qırım birdemligi’’ ruhunıñ İnternet-menbasına da irişim qapatıldı.

Ukraina Prezidentiniñ Qırım MC Temsilciligi ‘‘Qırım birdemligi’’ aq-uquq qorçalayıcı teşkilâtınıñ taqip etilüvini Qırımda rusiye cezalav organları tarafından insan aqlarını nevbetteki qaba, arsız ve muntazam şekilde bozuv olaraq saya. İstilâcı devletni temsil etken işğalci akimiyetniñ areketleri tınç ealige ve onıñ qorçalayıcılarına qarşı yapılğan terroristik faaliyetniñ alâmetini taşımaqta. İşğalci akimiyet tarafından insan aqlarını ve bu cümleden serbest toplaşuv ve professional faaliyetinen oğraşuv kibi aqlarnı qaba şekilde bozulmasına em halqara, em de ukrain mahkemeler qıymet kesmeli.