Qırım sakinleriniñ aqları boyunca Kıyivde muşavere

2018 senesi çiçek ayı (aprel) 11 künü Ukraina Prezidentiniñ Qırım MC Daimiy Temsilcisi Borıs Babin, onıñ Birinci muavini İzet Gdanov ve Temsilcilikteki hızmetlerniñ hadimleri Ukraina Prezidenti yanında devlet idaresi boyunca Milliy akademiyasınıñ negizinde Ukrainanıñ vaqtınca işğal etilgen Qırım topraqlarından kelgen Ukraina vatandaşlarınıñ, memleket içinde mecburen köçken şahıslarınıñ içtimaiy, tasil-medeniy ve mülkiyet aqlarına riayet etüv boyunca ofisten tış iş muşaveresini keçirdiler.

Muşaverede Vinnitsa, Donetsk, Jitomir, Kıyiv, Lugansk, Poltava, Sumı, Harkiv, Çernigiv vilayeti ve Kıyiv şeer devlet memuriyetleriniñ yolbaşçıları ve mütenasip bölükleriniñ hadimleri, Ukrainada Mahsus AHIT nezaret etici missiyanıñ, Ukrainada insan aqları boyunca Mahsus BMT nezaret etici missiyanıñ vekilleri, alimler, Ukraina Prezidenti yanında devlet idaresi boyunca Milliy akademiyasınıñ hadimleri iştirak etti.

Muşavere esnasında Qırımdan memleket içinde qıta Ukrainanıñ merkeziy ve cenübiy regionlarına mecburen köçken şahıslarnıñ eñ aktual meseleleri, bu cümleden, vaqtınca meskenniñ berilüvi, 2018 senesi kiriş kampaniyası çerçivesinde tasil hızmetlerine irişim, keyfiyetli tıbbiy hızmetlerge irişim, işke yerleşüvde yardım, içtimaiy hızmet alıcılarnıñ tasdıqlavı muzakere etildi.

Borıs Babin işğal etilgen yarımadada sözde ‘‘saylavlardan’’ soñ cezalavlarnıñ quvetlenüvi sebebinden Qırımdan memleket içinde köçken şahıslarnıñ sayısı defalarca arta bileceğine muşaverede bulunğanlarnıñ diqqatını çekti. Bunıñ içün mesken meselelerini semereli şekilde çezmek maqsadınen işğal etilgen Qırım sakinleriniñ teşkerüv mehanizmni mükemmeleştirmek ve devlet ve yerli bücetlerden maaliyeniñ ve halqara donorlardan tehnikiy yardımnıñ celp etilüvi boyunca işbirlikni quvetleştirmek kerektir. Bundan da ğayrı, Daimiy Temsilci aliy oquv yurtlarğa 2018 senesi kiriş imkânları aqqında Qırım sakinleri içün reklam-bildirüv kampaniyasını keçirmege kerek olğanını qayd etti.

Muşavereniñ neticesi olaraq, Qırımdan memleket içinde mecburen köçken şahıslarnıñ regional programmalar çerçivesinde vilâyetlerniñ yerli ealisinen teñ alda içtimaiy, tasil-medeniy ve mülkiyet aqlarına riayet etüvi maqsadınen kerekli areketler yapmaq, Temsilciliknen beraber qırımlılarnıñ yañı yerlerge alışuvı ve yerli cemiyetlerge integratsiya etüvi esnasında peyda olğan meselelerniñ çezilüvinde iştirak etmek, memleket içinde köçken, ya da vaqtınca işğal etilgen topraqlarda yaçamağa devam etken vatandaşlarğa regionlarnıñ oquv yurtlarında orta ve aliy tasil aluv imkânları aqqında haber etmek, memleket içinde köçken şahıslarnıñ meseleleri boyunca tedbirlerniñ keçirilüvini ve mütenasip regional programmalarğa para ayırıluvınıñ seviyesini teşkermek, memleket içinde köçken şahıslarğa Ukraina devlet bücetinden yüksek keyfiyetli tıbbiy yardım içün para ayırıluvı üstünde çalışmaq, er ay ve üç ayda bir kere regionlarda memleket içinde mecburen köçken şahıslarınıñ içtimaiy, tasil-medeniy ve mülkiyet aqlarına riayet etüv boyunca malümat berüv algoritmni Temsilciliknen uyğunlaştirmaq kibi qararlar alındı.