Oleg Sentsovğa Lehistan Cumhuriyeti çetel işler Nazirliginiñ mukâfatı

2018 senesi ilk qış (dekabr) ayı 1 künü Ukraina Prezidentiniñ Qırım MC Daimiy Temsilcisi Borıs Babin işğal etilgen Qırımda sözde terroristik faaliyet içün sahte qabaatlavlar esasında ale daa Rusiye apishanesinde bulunğan ukrain kinorejissörı Oleg Sentsovğa Lehistan Cumhuriyeti çetel işler Nazirliginiñ «Pro Dignitate Humana» (‘‘İnsan menligi içün’’) mukâfatınıñ Kıyiv şeerindeki Azreti Sofiya kilisesinde tantanalı taqdim etilüvinde iştirak etti.

Lehistan Cumhuriyeti çetel işler Naziri Yatsek Çaputoviç mükâfatnı qaramannıñ tatası Natali Kaplanğa şahsen taqdim etti, Lehistan halqınıñ ukrainalılar ile birdemligini bildirdi ve Oleg Sentsov eñ yaqın kelecekte yanımızda olacağında eminlik bildirdi.

Lehistan Cumhuriyetiniñ Ukrainada Elçisi Yan Peklo bu mukâfat insan aq-uquqlarını ve insan menligini ürmet etüvni qorçalav oğrunda sarsılmaz mevamını numayış etken şahıslarğa berilgenini bildirdi, yarımada topraqlarında rus istilâcı tarafından taqip etilgen ve cezalanğan şahıslarnıñ aq-uquqlarını qorçalav oğrunda fedakâr ve barışılmaz faaliyet yürsetken Oleg Sentsov onı almağa lâyıq olğanını qayd etti.

Ukraina çetel işler Naziri Pavlo Klımkin ve Daimiy Temsilci Borıs Babin Lehistan Cumhuriyetiniñ çetel işler Nazirine ve Lehistan diplomatlarına Oleg Sentsov sıfatında bütün ukrain siyasiy mabuslarına qol tutuv, Ukrainanıñ istilâcısı ile küreşine diqqat etüv ve halqara seviyede Qırımnı ilhaq etmek ıntıluvlarını tanımamazlıq boyunca qattı mevamı içün öz minnetdarlıqlarını bildirdiler.