”Endiden başlap, vaqtınca işğal etilgen Qırım ile memuriy sıñırda gümrükhane yoq. Qırım ile memuriy sıñır, devlet sıñırı degil, anda gümrükhaneniñ keregi yoq”, – dep izaatladı Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç

2021 senesi boş aynıñ 21-de ”«Qırım» serbest iqtisadiy zonasını teşkil etüv ve vaqtınca işğal etilgen Ukraina topraqlarında iqtisadiy faaliyetni yürsetüv aqqında” Ukraina Qanunını lâğu etüv ve bazı Ukraina qanunlarına deñişmeler kirsetüv aqqında” Ukraina qanunı amelge keçirildi.


Bu qanun bir çoq devlet organlar ve cemaat teşkilâtlar tarafından devamlı ve muntazam şekilde alınıp barılğan faaliyetniñ neticesidir.

Deerlik bir yıl evelsi biz ”«Qırım» serbest iqtisadiy zonasını teşkil etüv ve vaqtınca işğal etilgen Ukraina topraqlarında iqtisadiy faaliyetni yürsetüv aqqında” Ukraina Qanunını lâğu etüvge dair iş gruppasınıñ birinci toplaşuvında iştirak etkenimiz aqqında haber etken edik: https://www.facebook.com/ppu.gov.ua/posts/1490895011298912

Bu yıl devamında biz faal şekilde deñişmeler üzerinde çalışıp, bu ceryannı köçürtkenlerden edik. Ukraina Prezidenti Volodımır Zelenskıy da bu lâğu etüvge qol tutqanı bizler içün pek müim edi.

Bu yılnıñ mayıs ayında azır qanun leyhalar cıyımını Ukraina halq deputatları Rustem Umerov, Mariya Mezentseva ve Yaroslav Jeleznâk Ukraina Yuqarı Şurasına taqdim etti: https://www.facebook.com/ppu.gov.ua/posts/1668687323519679. Oraq ayınıñ 1-de Ukraina Yuqarı şurası mütenasip qanun leyhalarına qol tuttı.

Niayet biz, umumiy ğayretlerimiznen ameliy neticelerge irişkenimiz aqqında ayta bilemiz. İleride bizni bir sira normativ-uquqiy senetlerniñ amelge keçirilüvi beklemekte. Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç adiseni böyle şekilde izaatladı: ”Vaqtınca işğal etilgen Qırım Muhtar Cumhuriyeti ve Aqyar şeeri topraqlarında iqtisadiy faaliyetniñ kerçekleşmesine yol bergen ve daimiy şekilde Qırımda yaşağan Ukraina vatandaşlarını sıñırlağan maddelerni içergen ayıp «Qırım» serbest iqtisadiy zonası artıq yoqtır”.

Aşağıdaki deñişmeler qabul etildi:

Qırım sakinlerine qarşı bergi ve gümrük sıñırlamalar lâğu etile, şu cümleden olar bu saalardaki uquqiy munasebetlerde kene Ukraina rezidentleri olaraq tanılacaq;
Qırımğa kelgen ya da Qırımdan ketkenler içün taşılması ruhset etilgen şeyler cedveli yerine taşılması yasaq etilgen şeyler cedveli belgilenecek;
”Bedava uquqiy yardım aqqında” Ukraina qanunına kirsetilgen deñişmeler vaqtınca işğal etilgen topraqlarnıñ sakinlerine memleket içinde avuşqan şahıslar malümat kâğıdını almayıp ekinci nevbet bedava uquqiy yardımnı almaq imkâniyetini yarata;
işğalden evel başlatılğan, amma bitirilmegen mirasçılıq meselelerni bitirmek imkâniyeti yaratıla.

İşğal etilgen topraqlarda yaşağan insanlarnıñ aqlarını ğayrıdan tiklevnen beraber, Qırımda ticariy faaliyetke dair sıñırlamalar saqlanıp quvetleştirilecektir:
vaqtınca işğal etilgen topraqlarğa/dan bir-de-bir mahsulatnıñ avuştırılması yasaqtır;
işğal etilgen topraqlarda idare etici qanunlar işletilmey, bu sebepten faaliyet içün resmiy ruhsetnameler ya da mahsus ruhsetler berilmey, işğalden evel berilgen soyları ise toqtatıla ve qayd etilmeden ğayrıdan uzatılmay;
vaqtınca işğal etilgen topraqlarda istisal etilgen mahsulatqa ukrain aktsız markaları ve sertifikatları berilmey.

Bundan ğayrı, umumdevlet bergi ve tölemeler, yekâne ücret, mıtlaqiy devlet pension sigortanıñ ücreti vaqtınca işğal etilgen topraqlarda faaliyetlerini yürsetken uquqiy şahıslardan (olarnıñ ayrı bölüklerinden) ve fizikiy şahıslardan qabul etilmey.

Temsilcilik, cemiyetimiz tarafından çoqtan berli beklenilip, şu cümleden vaqtınca işğal etilgen Qırım yarımadası topraqlarında yaşağan vatandaşlarımızğa dair diskriminatsion qanun maddeleriniñ lâğu etilmesini maqsat etip qoyğan qanunnıñ müelliflerinden biridir.

”Qırım” serbest iqtisadiy zonasınıñ lâğu etilmesinde iştirak etken er keske minnetdarlığımıznı bildiremiz

#QırımUkrainadır #UkrainaPrezidentiniñQırımMCTemsilcilgi #QırımPlatforması #CrimeaPlatform #Ukraina #Ukraine #Qırım #Crime