Marına Poroşenko ”İşğal etilgen Qırım: 5 yıl devamında qarşılıq kösterüv” mevzusında 5-nci Halqara forumnı açtı ve ”Acayip Qırım ikâyeleri” sergini ziyaret etti

Ukraina Prezidentiniñ ömür arqadaşı, Ukraina medeniy fondunıñ reisi, ”Mistetskiy arsenalnı” inkişaf ettirüv meseleleri boyunca Şuranıñ reisdeşi Marına Poroşenko Ukraina boyunca AQŞ Departamentiniñ Mahsus vekili Kurt Volker ile beraber ”İşğal etilgen Qırım: 5 yıl devamında qarşılıq kösterüv” mevzusında 5-nci Halqara forumnı açtı ve ”Acayip Qırım ikâyeleri” sergini ziyaret etti.

Marına Poroşenko, Qırım Ukrainağa ait olğanını qayd etti. ”Böyle cevapnı ukrain halqı, qırımtatar halqı, dünyanıñ bütün demokratik halqları ve ükümetleri bermekte. Küreşimiz em Qırımda, em Donbasta, em de Rusiyede bulunğan bütün ukrain reineleri ve esirleri evlerine qaytmağance devam etecek”, – dep bildirdi Ukraina Prezidentiniñ ömür arqadaşı.

Marına Poroşenko ukrain Qırımı içün küreşken bütün Qırım vatanperverlerine öz minnetdarlığını bildirdi. ”Bizim yüreklerimiz ve fikirlerimiz daima ukrain siyasiy mabuslarınen beraberdir. Olarnıñ arasında Oleg Sentsov, Oleksandr Kolçenko ve keçken afta Qırımdan Uralğa alıp ketilgen Volodımır Baluhtır”, – dep qayd etti Prezidentimizniñ ömür arqadaşı.

Sergi esnasında ziyaret eticiler 15 ukrain müzeyinde ve şahsiy kollektsiyalarda saqlanğan beñzersiz eşyalar vastasınen taqdim etilgen Qırım yarımadasınıñ medeniy asabaliğınen tanış oldılar. Qıymetli skif altınından yasalğan ziynetler, çeşit devirlerge ait olğan silâ ve savut nümüneleri, resimler, atiqiy miras ve zemaneviy sanat eserleri – bularnıñ episi Avrasiya Çolleri ile Aqdeniz arasında inkişaf etken medeniyetniñ beñzersiz qısqa ikâyeleridir.

Bundan da ğayrı, seyirciler qave ananesiniñ, qırımtatar nağışınıñ hususiyetleri, Manğup-qale atikiy abidesi, qaraylar, sarmat portretleri, kimmer efsanesi ve tavlılarnıñ kiyimleri aqqında malümat diñlediler.

Ressam Mariya Kulikovska mahsus by sergi içün ”Altın toz” adlı areket etken eykelni azırladı. Maden, ağaç, çeşit türlü topraq, faydalı qazımtılar, taş tozu, qum, deñiz tuzı ve başqa malzemeler vastasınen usta Keriç yarımadasınıñ haritasını meydanğa ketirdi.

Tedbirni Ukraina haber siyaset Nazirligi ve Ukraina medeniyet Nazirliginiñ qol tutuvı ile ”Mistetskiy Arsenal” Milliy medeniy-icadiy ve müzey kompleksi ile Qırım evi teşkil ettiler.