‘‘Qırımtatarlar: keçmişleri ve bügüni’’ – Melitopolde halqara konferentsiya

 

2018 senesi çiçek ayı (aprel) 13 künü Ukraina Prezidentiniñ Qırım MC Daimiy Temsilcisi ve Qırım MC işğalden azat etülüvi ve ğayrıdan integratsiyası boyunca hızmetniñ baş mesleatçısı Melitopol şeerinde keçken ‘‘Qırımtatarlar: keçmişleri ve bügüni’’ mevzusında halqara ilmiy-ameliy konferentsiyada iştirak ettiler. Tedbir Melitopol devlet pedagogik universitetiniñ 95 yıllığına ve Melitopol şeerinde ‘‘Azat’’ qırımtatar teşkilâtınıñ 25 yıllığına bağışlandı. Tögerek masada universitetniñ reberiyeti ve alimleri, Qırımtatar Milliy Meclisiniñ reis muavini İlmi Umerov ve Meclisniñ azaları, ekspertler ve cemaat faalcileri iştirak etti.

Melitopolge yapqan seyaatı çerçivesinde Daimiy Temsilci şeer başlığı ile körüşip, Qırımdan Melitopolge memleket içinde köçken şahıslarnıñ aqlarınıñ qorçalavını ve yerli Memuriy hızmet merkezinde qırımlılarnıñ pasport meseleleriniñ çezilüvi imkâniyetini muzakere etti. Bundan da ğayrı, Daimiy Temsilci qırım qaraimlerniñ ‘‘Kale’’ medeniy cemiyetini ziyaret etti, körüşüv esnasında bu tamır halqınıñ Ukrainanıñ nezareti altında bulunğan topraqlarda inkişafı ve işğal etilgen Qırımda qaraimlerge qarşı yapılğan basqı muzakere etildi.