Ukrain matbuat vastalarinda Qırım mevzusı

2018 senesi çiçek ayı (aprel) 11 künü Ukraina Prezidentiniñ Qırım MC Temsilciligindeki halqara alâqalar hızmetiniñ baş mutehassısı Valeriya Pahomova ‘‘Terciman’’ birinci qırımtatar gazetasınıñ 135 yıllığına bağışlanğan ‘‘Ukrain matbuat vastalarinda Qırım mevzusı’’ serlevalı  ‘‘Media Forum Terciman’’da iştirak etti.

Forumğa Qırımtatar Milliy Meclisiniñ reisi ve azaları, tatar cemaat erbabı, sabıq siyasiy mabüs Rafis Kaşapov, tele ve radio yayınlavlarınıñ meseleleri boyunca Ukraina Milliy Şurasınıñ azaları, ‘‘Qırım cemiyetleriniñ radiosı’’ közetüv şurasınıñ başlığı, ‘‘Qırım aqiqat’’ matbuat vastasınıñ baş muariri, ‘‘Qırım evi’’ devlet muessisesiniñ program müdiri, ‘‘Milliy gazet-mecmua matbuatı’’nıñ general müdiri, ‘‘QHA’’ İnternet matbuat vastasınıñ baş muariri, ‘‘Hayat’’ ve ‘‘Qırım. Aqiqat’’ radiolarınıñ general müdirleri, ‘‘Ukraina milliy cemaat teleradioşirketi’’ halq öğündeki aktsioner cemiyetiniñ (ПАТ “НСТУ”) baş yapımcısı ve idare başlığı, jurnalistler, media-ekspertler, blogerler ve cemaat faalcileri iştirak ettiler.

Tedbir televizion, radio, neşir etilgen ve İnternet matbuat vastaları olaraq üç panel şekilinde keçirildi.

Forum esnasında qırım mevzusınıñ ukrain media saasına kirsetilüvi, ukrain matbuat vastalarında ve yayınlarında işğal etilgen topraqlarnıñ meseleleriniñ aydınlatıluvı muzakere etildi.

Tedbirniñ neticesi olaraq, iştirakçiler esas ukrain matbuat vastalarında qırım mevzusınıñ aydınlatıluvı boyunca işbirlikni faalleştirmege añlaştılar.