Qara ve Azaq deñizlerinde Rusiye tecavüzi boyunca tögerek masa

2018 senesi boş ay (noyabr) 28 künü Temsilcilikteki halqara alâqalar hızmetiniñ reisi Yevgen Samuha tışqı siyasiy tedqiqatlar İnstitutı tarafından teşkil etilip, ”Çetel temsilcilikler hızmetiniñ baş müdirligi” devlet müessisesiniñ matbuat merkezinde keçirilgen ”Qara ve Azaq deñizlerinde Rusiye tecavüzi – Rusiyeniñ Ukrainağa qarşı deñiz tecavüzini nasıl toqtatmalı?” mevzusında tögerek masada iştirak etti.

Tedbirde çıqışta bulunğanlarnıñ arasında Ukraina çetel işler Naziri (2007-2008) Volodımır Ogrızko, Ukraina çetel işler Nazirliginiñ mahsus avaleleri boyunca elçisi, bölük müdiri (2008-2017) Leonid Osavolük, Ukraina Silâlı Quvetleri Arbiy-deñiz Quvetleri Komandanı (2014-2016) Sergiy Gayduk, halqara saada ukrain uquqçısı, adliye ilimleri doktorı, professor, Ukrainada nam qazanğan adliyeci Volodımır Vasılenko, ‘‘Çetel işler Maydanı’’ Fondu közetüv şurasınıñ yolbaşçısı, Qırım meseleleri boyunca ekspert, ‘‘Вlackseanews’’ saytınıñ baş muarriri Andriy Klımenko, tışqı siyasiy tedqiqatlar İnstitutınıñ müdiri Grıgoriy Perepelıtsa bar ediler. Bundan da ğayrı, tedbirde Ukrainadaki çetel diplomatik temsilciliklerniñ vekilleri de iştirak etti.

Yuqarıda qayd etilgen meseleniñ siyasiy diplomatik ve arbiy-siyasiy hususiyetlerini ihtisaslı ve samimiy tarzda munaqaşa etüv esnasında tögerek masa iştirakçileri Qara ve Azaq deñizlerinde Ukrainanıñ deñiz havfsızlığını temin etüv ceryanında halqara-uquqiy vastalarnıñ semereligini, deñizde rus istilâsına qarşılıq kösterüv oğrunda devletimiz ve onıñ halqara ortaqları tarafından yapılması kerek olğan adımlarnı muzakere ettiler, Ukrainanıñ milliy menfaatlarını qorlaçav ve RF-nıñ duşmaniy areketlerine qarşılıq kösterüv saasında ayrı akimiyet organlarınıñ alçaq keyfiyetli faaliyetini adaletli teñqitke oğrattılar.