”Er biriñiz Ukraina içün muimdir” – Prezident Türkiyedeki ukrain ve qırımtatar cemiyetleriniñ vekillerinen körüşti

Türkiye Cumhuriyetine resmiy ziyareti esnasında Ukraina Prezidenti Volodımır Zelenskiy Ankarada ukrain ve qırımtatar cemiyetleriniñ vekillerinen körüşip, qırımtatar dernegi içün yañı ofis binasınıñ açıluvında iştirak etti.

”Qırımtatar cemaatınıñ yañı musafirçen evinde siziñle körüşüvimizden ğayet memnünim. Bir büyük horanta olaraq toplanğanımız teren manalar taşıy, ukrain ve qırımtatar cemiyetleriniñ sıqı işbirligi meni quvandıra”, – dep bildirdi körüşüvniñ başında devlet Başlığı.

Prezident cemiyetlerge Ukraina ile birdemli olğanları, bu qıyın vaqıtta devletimizge ameliy şekilde qol tutqanları, em de Ukraina ile Türkiye arasında strategik işbirlikni qurmağa yardım etkenleri içün öz minnetdarlığını bildridi. Aynı vaqıtta o, Türkiyeniñ çeşit şeerlerindeki ukrain cemiyetleriniñ faaliyetlerine ve soñkü vaqıtnıñ esas qazançına – insanlar arası munasebetlerge yüksek qıymet kesti.

”İstiqrarlı faaliyetiñiz sayesinde Türkiyedeki ukrain cemiyet quvetleşe ve kerçekten de tesirli küçke çevirile”, – dep qayd etti Volodımır Zelenskiy.

”Devletimizge qol tutuv maqsadınen defalarca keçirilgen tedbirleriñiz, maneviy ve maddiy yardımıñız, yazıqlar olsun ki, babasız qalğan ukrain balalarını tedaviylevge qol tutuvıñız içün teşekkür etem. Ukrainanı qalbiñizde qorçalağanıñız içün teşekkür etem”, – dep qoştı devlet Başlığı.

Prezident, Türkiye toprağı körüşüvde bulunğanlar içün yañı evge çevirilgenine baqmadan, er biri Ukrainada beklenilgenini hatırlattı ve Vatanlarını ğayrıdan tiklevge qoşulmağa davet etti. ”Tecribeñiz, bilgileriñiz ve imkânlarıñız ile er biriñiz Ukraina içün muimdir. Taqımım öz ögünde pek büyük maqsatlar qoydı: böyle memleket qurmağa isteymiz ki, çetelde qazanç ve güzel yaşayış qıdırğan vatandaşlarımız quvana-quvana evlerine qaytsın. Bu yañı Ukrainanıñ quruluvında iştirak etmeñizni pek ister edim – biz siziñ yardımıñızğa muhtacmız”, – dep qayd etti o.

Bundan ğayrı, Volodımır Zelenskiy Türkiye Prezidenti Recep Tayıp Erdoğan ile bügünki muzakereler esnasında Qırımnı işğalden azat etüvni ve Rusiye tarafından muntazam şekilde qırımtatalarnıñ ve ukrainalılarnıñ aq-uquqlarınıñ bozuluvını muzakere etecegini bildirdi.

Prezident, Qırımda işğalci akimiyet tarafından qırımtatarlarnıñ aq-uquqlarınıñ bozuluvına Ukraina halqara cemiyetniñ diqqatını celp etmege devam etecegini qayd etti, aynı vaqıtta ukrain akimiyeti Rusiye istilâsı sebebinden Qırımnı terk etmege mecbur olğan qırımtatarlarnıñ vaziyetini diqqatnen ögrene. ”Emin oluñız ki, Ukraina qaçaqlarnı öz başına qaldırmaz. Siziñ içün öz tuvğanlarıñıznı ve ana toprağıñıznı ziyaret etüv ne qadar muim olğanını da añlaymız. Eñ yaqın vaqıtta qanuniy seviyede Qırımnıñ ziyaret etilüvini qolaylaştırğan qanun qabul etilecektir”, – dep yekünledi devlet Başlığı.

Bundan da ğayrı, ziyaret çerçivesinde Ukraina Prezidenti Türkiye Cumhuriyetiniñ qurucısı ve birinci Prezidenti Mustafa Kemal Atatürkniñ Qabrine çiçekler qoydı ve Qabirniñ itibarlı ziyaretçileri kitabında yazısını qaldırdı.

Menba: https://www.president.gov.ua/news/kozhen-z-vas-ye-vazhlivim-dlya-ukrayini-prezident-na-zustric-56745