Ukraina Prezidentiniñ Qırım Muhtar Cumhuriyetindeki Temsilciligi tarafından Ukraina infraterkip Nazirligine ait olğan «”Keriç parom keçiti” Devlet deñizcilik şirketiniñ» mülkiyetini qanunsız şekilde satıluvına ve 2014 senesi qara qış ayınıñ 1-ne qadar Ukraina agrar siyaseti ve aşayt Nazirliginiñ idaresi altında bulunğan «”Massandra” Milliy istisal-agrar birleşme» Devlet şirketiniñ qanunsız şekilde ”hususiyleştirilüvine” dair toplanğan malümatlar Qırım Muhtar Cumhuriyeti ve Aqyar şeeri Prokuraturasına teslim etildi

İdareler arası işbirlik çerçivesinde Qırım Muhtar Cumhuriyeti ve Aqyar şeeri Prokuraturası yuqarıda añılğan vaqialarğa dair mülkiyetni qanunsız şekilde elde etüv, hırsızlav ve tüketüv, vesiqalarnı, pullarnı, müürlerni hırsızlav ve elde etüv, olarnı, şu cümleden, aldav ya da hızmet vazifesini suistimal etüv yolunen elde etüvge dair açılğan cinaiy dava boyunca mahkemeden evel alıp barılğan taqiqatqa protsesual reberlik yapımaqtadır.

Mahkemeden evel alıp barılğan taqiqat neticesinde vaqtınca iğal etilgen Qırım MC ve Aqyar şeeri topraqlarında qanunsız şekilde teşkil etilgen ”Qırım Cumhuriyeti Devlet Şurası”, ”Qırım Nazirler Şurası” ve başqa qanunsız akimiyet organlarınıñ vekilleri tarafından devlet şirketlerine, müessiselerine, teşkilâtlarına ait olğan mülkiyetniñ sözde ”hususiyleştirilüvine” ve satıluvına dair bir sıra qararlar alınıp, neticede devletke pek büyük miqdarda zarar ketirildi.

Temsilcilik tarafından teslim etilgen malümatlar teşkerilip cinaiy davalarğa qoşulmaqtadır.