Ukraina Prezidenti Volodımır Zelenskiyniñ inauguratsiyasındaki çıqışı

Aziz ukrainalılar!

Saylavlardaki ğalebemden soñ menim altı yaşındaki oğlum:

”Babam! Televizorde, Zelenskiy Prezident olğanını deyler..

Demek… men de Prezidentim!”, – dep soradı.

O vaqıt bu bir şaqa kibi aytıldı, amma soñra men bu sözlerniñ kerçekligini añladım.

Çünki er birimiz Prezidenttir.

Tek maña rey bergen 73% degil de, bütün 100% ukrainalılar.

Bu menim şahsiy ğalebem degil de, bizim umumiy ğalebemizdir.

Bu – bizim umumiy imkânımız. Bunıñ içün biz umumiy mesüliyet taşıymız.

Ve şimdi men bir özüm ant etmedim. Er birimiz Esas qanun üstüne qolunı qoyıp, Ukrainağa sadıq olmağa ant etti.

”Prezident bergilerini ödemey”, ”Sarhoş Prezident qırmızı yarıqqa ketti”, ”Prezident ”bunı er kes yapqanı içün” yavaş-yavaş hırsızlay” şekilinde gazeta başlıqlarını tasavur etiñiz.

Bu bir masqaralıq olğanınen razısıñızmı?

Er birimiz Prezident olğanını aytqanda, men işte bunı közde tutam.

Bügünden başlap, er birimiz balalarına qaldıracaq memleket içün mesüliyetlidir.

Er birimiz öz yerinde Ukraina inkişaf etmesi içün er şey yapa bile.

Avropalı memleket er birimizden başlay.

Avropa yönelişini seçtik, amma Avropa qayerdedir degil. Avropa – mındadır (muarririyetten ”başımızda”). Ve o anda peyda olsa – o vaqıt mında da, bütün Ukrainada peyda olur.

Bu – bizim umumiy arzumızdır.

Amma umumiy ağrımız da bar.

Er birimiz Donbasta elâk oldı.

Er kün biz er birimizni ğayıp etemiz.

Ve er birimiz – mecburen köçkenlerdendir.

Öz evini ğayıp etken… Ve bu acını is etip, öz eviniñ qapılarını açqan.

Ve er birimiz – çetelde para qazanğan insan.

Özüni tuvğan evinde tapmayıp, yat devlette qazançını tapqan.

Fuqarelik ile küreşinde meñligini ğayıp etmege mecbur olğan.

Amma biz bunıñ episini yeñermiz! Çünki er birimiz – ukrainalıdır.

Biz epimiz ukrainalımız, aramızda çoq ya da az olğanlar, doğru ya da yañlış olğanlar yoq.

Ujgoroddan Luganskka qadar. Çernigovdan Aqmescitkece. Lvovda, Harkivde, Donetskte, Dniproda ve Odesada – epimiz ukrainalımız.

Ve biz beraber olmalımız. Çünki tek o zaman küçlümiz.

Bügün dünyadaki bütün ukrainalılarğa muracaat etem. Biz 65 millionmız.

Ebet, ayretlenmeñiz, biz 65 millionmız. Ukrain toprağında doğğanlar.

Avropa ile Asiyada, Şimaliy ve Cenübiy Amerikada, Avstraliyada ve Afrikadaki ukrainalılar. Dünyadaki bütün ukrainalılarğa muracaat etem!

Biz sizge pek muhtaçmız. Yañı, küçlü ve muvafaqiyetli Ukrainanı qurmağa azır olğan er insanğa men memnüniyetliknen Ukraina vatandaşlığını beririm.

Ukrainağa musafirlikke degil, evge kelmege kereksiñiz.

Biz sizni bekleymiz. Çetelden hatıra bahşışları kerekmey, lütfen, bilgileriñizni, tecribeñizni ve ruhiy baylığıñıznı ketiriñiz.

Bularnıñ episi bizge yañı devirni başlamağa yardım eter.

Şübelengenler buña hayal derler. Bu imkânsızdır.

Bu bizim milliy ğayemiz degilmi eken? Birleşip, imkânsız şeylerni yapmaq.

Bir şeyge baqmayıp!

Futbol boyunca Avropa çempionlığında İslandiya taqımını hatırlañız.

Tış ekimi, rejissör, uçucı, student ve cıyıştırıcı memleketleri içün küreştiler. Ve buña kimse inanmasa da, ğalebe qazandılar.

Bu bizim yolumız. Futbolda islandiyalılar, öz toprağımıznıñ mudafaasında israilliler, tehnologiyalarda yaponiyalılar, farqlılıqlarımızğa baqmadan, beraberlikte bahtlı yaşamaq qabiliyetinde isviçreliler kibi olmalımız.

Ve bizim birinci vazifemiz – Donbastaki ateşni toqtatmaqtır.

Menden defalarca ”Ateşni toqtatmaq içün nege azırsıñız”, – dep soradılar.

Hucur sual. Yaqın adamlarıñıznıñ ayatları içün siz nege azırsıñız?

Emin etem ki, qaramanlarımız bir daa elâk olmasın dep, men er şeyge azırım.

Qıyın qararlarnı almağa, öz rağbetimi, reytingimni ve tınçlıq adına kerek olsa – öz iş yerimni coymağa iç te qorqmayım.

Topraqlarımıznı coymadan.

Tarih – adaletsiz şeydir.

Biz bu cenkni başlamadıq. Amma biz bu cenkni toqtatmalımız.

Ve biz sübetke azırmız. Eminim ki, bu sübetniñ başlanması içün eñ güzel birinci adım – bütün ukrain esirleriniñ qaytarıluvıdır.

Bizim nevbetteki çağıruvımız – ğayıp etilgen topraqlarıımıznıñ qaytarıluvıdır.

Asılında, bu ibare doğru degil, dep sayam.

Çünki bizge ait olğan şeyni coymağa mümkün degil.

Qırım ve Donbas – bizim ukrain topraqlarımızdır.

Olarda biz eñ muim şeyni ğayıp ettik. Bu – adamlardır.

Bügün biz olarnıñ şuurlarını qaytarmalımız. İşte, ğayıp etilgen şey budır.

Bu yıllar devamında akimiyet olarnıñ özlerini ukrainalılar olaraq is etmeleri içün iç bir şey yapmadı. Yat olmağanları, bizim ukrainalılarmız olğanlarını bilmeleri içün.

İsteseler, onar pasport bersinler – bunıñ emiyeti yoq. Ukrainalı pasportta degil. Ukrainalı mındadır.

Men bunı pek yahşı bilem. Ukrainanı qorçalağan askerlerimizden, ukrain tilli ve rus tilli qaramanlarımızdan bilem.

Anda, cebede, qavğalar ile añlaşmamazlıq yoq.

Bizim qorçalayıcılarımızğa muracaat etmek isteyim.

Ayatlarını er kün vatanları içün ğayıp etken adamlar akimiyet tarafından ürmet etilmegen devletniñ ordusı küçlü olmaz. Ürmet etilgeniñizni is etmeñiz içün qolumdan kelgenini yaparım. Bu lâyıq ve eñ muimi, istiqrarlı maddiy teminlev, yaşayış şaraitleriñiz, cenk vazifeleriñizden soñ qanuniy tatil, özüñiz ve qorantalarıñız içün raatlıqtır.

NATO standartları aqqında laf etmeyip,olarnı yaratmaq kerek.

Şübesiz ki, cenkten ğayrı, daa çoq şeyler ukrainalılarnı bedbaht etmekte. Bu qorqunçlı fiyatlar, aşalayıcı aylıqlarnen pensiyalar ve iş yerlerniñ yoqluğıdır.

Bu, balasınen iç bir vaqıt adiy hastahanede yatmağan adamlar tarafından maqtalğan tıbdır.

Bu, yalıñız birevniñ hayalında qurulıp tamir etilgen efsaneviy ukrain yollarıdır.

Acayıp Amerika Prezidenti olğan bir amerikalı aktörnıñ sözlerini tekrarlamağa isteyim: ”Ükümet bizim meselelerimizni çezmey. Ükümet – bizim meselemizdir”.

”Biz iç bir şey yapıp olamaymız”, – degen ükümetimizni añlap olamayım.

Yalan. Yapıp olasıñız.

Kâğıt ile qalem alıp, kelecek saylavlar aqqında degil de, kelecek nesillerni tüşüngen adamlar içün öz yerleriñizni boşata bilesiñiz!

Bunı yapıñız. Adamlar buña lâyıq qıymet keserler.

Ne içündir siyrek şapıldatasıñız. Sözerimni er kes begenmeymi?

Nafile, bunı men degil de, Ukraina halqı ayta.

Meni saylağan vatandaşlar 28 yıl devamında imkânlar memleketini qurğan oqumışlı, tertibatlı, kibar siyasetçilerden boldurğanlarını kösterdiler.

”Qaytaruvlar”, ”aqımlar”, ”çaypavlar” imkânları.

Biz başqa imkânlarnı bergen memleketni qurarmız.

Er kes qanun ögünde teñ, qanunları doğru ve açıq olğan yerni. Er kes içün bir qanunlar.

Bunıñ içün ise milletke hızmet etecek adamlar akimiyetke kelmeli.

İş odalarıñızda resimim olmağanını pek isteyim.

Prezident – ikona, put, ya da portret degildir.

Anda öz balalarıñıznıñ resimlerini asıp, qarar almazdan evel olarnıñ közlerine baqıñız.

Men daa çoq şey ayta bilem, amma ukrainalılar söz degil, areketler isteyler. Onıñ içün…

Ürmetli deputatlar!

İnauguratsiyanı bazarertesine, yani iş kününe tayın ettiñiz.

Bunıñ müsbet tarafı – demek, siz çalışmağa azırsıñız.

Onıñ içün, aşağıdaki qararlarnı qabul etmege rica etem:

  1. Deputat toqunmamazlığını lâğu etüv aqqında qanun.
  2. Qanunsız qazanuv içün cinaiy mesüliyet aqqında qanun.
  3. Çoqtan berli beklenilgen Saylav kodeksini ve açıq cedvellernı yapmaq.

Bundan ğayrı. Vazifelerinden aşağıdaki şahıslarnı azat etmek:

  1. Ukraina Havfsızlıq Hızmetiniñ Başlığını.
  2. Ukraina Baş Prokurorını.
  3. Ukraina mudafaa Nazirini.

Daa ziyade şey yapa bilesiñiz. Amma şimdilik bu yeterli.

Eki ayıñız bar. Bu muim qararlarnı ve qanunlarnı qabul etiñiz.

Bütün medallerni köküsleriñizge asıñız.

Nevbetten tış parlament saylavları içün yahşı azırlanıñız.

8 çağıruv Ukraina Yuqarı Şurasını vazifesinden boşatam.

Ukrainağa şan-şüretler olsun!

Ve niayet. Aziz halqım!

Bütün ömürim boyu ukrainalılarnı küldürmege tırışa edim.

Bu menim vazifem edi.

Endi ukrainalılarnıñ ağlamamaları içün qolumdan kelgenini yapacam.