Avropağa integratsiya meseleleri boyunca tedqiqat

2018 senesi boş ay (noyabr) 6 künü Kıyiv şeerindeki ‘‘Yañı Avropa’’ Merkezinde USAID ve Pact in UA çetelden ortaqlarnıñ qol tutuvı ile azırlanğan ‘‘Avropağa integrasiyağa Odesa ve Herson sakinleriniñ nazarları’’ mevzusında tezkere taqdim etildi.

Tedbirde Temsilcilikteki halqara alâqalar hızmetiniñ reisi Yevgen Samuha iştirak etti, Ukrainada Latviya Cumhuriyetiniñ Fevqulâde ve Vekâletli Elçisi Yuris Poykans, Avropa Birligi Temsilciliginiñ Ukrainada matbuat attaşesi David Stulik, E’COMM agentligi, ‘‘Avropanıñ Ukraina ile alâqası’’ leyhasında alâqa boyunca ekspert Zoya Kazanjı çıqışta bulundılar.

Tedbir devamında Avropağa integratsiya esnasında rusiye gibrid istilâsı ile sıñırda bulunğan Ukraina cenübini qorçalav, sözde ‘‘rus dünyasınıñ’’ suçluğına qapılıp işğal etilgen Qırım içün Herson vilâyetindeki içtimaiy-siyasiy ve içtimaiy-iqtisadiy saalarında musbet deñişüvlerniñ misali, region ealisiniñ asılında Rusiyege gizli qol tutqan büyük qısımı arasındaki ‘‘tarafsızlıq’’ baqışlarnı aşuv muzakere etildi.

Sotsiologik tedqiqat müellifleriniñ ve tedbirde bulunğan ekspertlerniñ hulâsalarına binaen, Qırımğa yaqın olğan Herson vilâyeti al-azırda Ukraina Cenübiniñ eñ ziyade (sakinlerniñ ve bu cümleden, Qırımdan memleket içinde köçken şahıslarnıñ 42% AB integratsiyağa qol tuta) Avropağa ıntılğan regionı ve işğal etilgen yarımadanıñ sakinlerini celp etken ‘‘köstergiçtir’’ – misal olaraq, Herson şeerindeki ava limanından keçken yolcularnıñ miqdarı 2014-2018 seneler devamında 13 kere arttı. Yevgen Samuha qayd etkenine köre, böyle vaziyet, Temsilcilikniñ ve onıñ hadimleriniñ kündelik maqsatkâr ve muntazam faaliyetiniñ neticelerinden biridir.