Vaqtınca işğal etilgen Qırım Muhtar Cumhuriyetinde yaşamağa devam etken ve memleket içinde köçken Ukraina vatandaşlarınıñ diqqatına!

2019 senesi saban (mart) ayı 31 künü Ukraina Prezidenti saylavları keçirilecek. Vaqtınca işğal etilgen Qırım Muhtar Cumhuriyetinde ve Aqyar şeerinde yaşağan Ukraina vatandaşları, rey berüv yerlerini deñiştirip, prezident saylavlarında iştirak ete bileler. Aynı aq ile memleket içinde köçken şahıslar da (”Memleket içinde köçken şahıslarnıñ aq-uquqlarını ve serbestliklerini temin etüv aqqında” Ukraina qanunınıñ 8 maddesine binaen) faydalana bileler.