Ervin İbragimovnıñ doğğan künü

Qırımtatar faali, Bağçasaray regional Qırımtatar Milliy Meclisiniñ azası, Bütündünya qırımtatar kongressi icra komitetiniñ azası, sabıq Bağçasaray rayon şurasınıñ deputatı Ervin İbragimov bugün qorantası ve dostları ile beraber 36-ncı doğğan kününi qayd etecek edi.

Amma 2016 senesi qural aynıñ 24-de o, Bağçasaray şeerinde belgisiz şahıslar tarafından zorbalıqnen ğayıp etilgen edi. Ervin İbragimovnıñ babası onıñ boş arabasını soqaqta tapqan edi. O, hırsızlav adisesini qayd etken video nezaret etüv kamerasından yazuvnı elde etip oldı. Eki şahıs, olardan birisi sözde ”uquq qorçalav organlarınıñ” urbasına kiyingen edi, Ervinni arabasından sürüp çıqardı, mikroavtobusqa oturttı ve alıp ketti. O vaqıttan berli Ervin İbragimovnıñ bulunğan yeri belgisizdir.

İşğalci Rusiye Federatsiyası akimiyeti 5 yıl devamında onıñ bulunğan yeri aqqında malümat bermey, semereli taqiqat alıp barmay.

Bugün qorantasına ve yaqınlarına küç-quvet tilep, ”Ervin, biz seni hatırlaymız!”, dep aytmağa isteymiz.

Ümer ağa, Lilâ hanım, Siznen beraber bekleymiz, eminmiz, bu cinayetni işlegen şahıslar ille de mesüliyetke çekilecek!

Bulunğan yerleri bu küngece belgisiz olğan daa 14 şahısnı, yani Valeriy Vaşçuk, İvan Bondarets, Vasıl Çernış, Tımur Şaymardanov, Seyran Zinedinov, İslâm Cepparov, Cevdet İslâmov, Eskender Apselâmov, Fedor Kostenko, Muhtar Arislanov, Arlen Terehov, Ruslan Ganiyev, Arsen Aliyev ve Eskender İbrayimovnı zorbalıqnen qaçırğan şahıslar da, eminmiz ki, mesüliyetke çekilecektir.