Anton Korınevıç Halqara yazlıq ”Serbestlik lagerini” ziyaret etti

2019 senesi oraq (iyül) ayı 4 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç Halqara yazlıq ”Serbestlik lagerininiñ” faaliyetinde iştirak etti, bu lagerde Ukrainanıñ ve Avropanıñ çeşit köşelerinden kelgen yaşlar fikir almaşuvı içün toplanıp, bütün dünyadaki qurtulış areketlerinen, zorbalıqsız küreşniñ şekillerinen, insan aqlarını ve tamır halqlarını qorçalav boyunca BMT vastalarınen tanış ola.

Damiy Temsilci tedbir iştirakçilerinen beraber Qırım Deklaratsıyasını, Budapeşt Memorandumını, insan aqları boyunca Umumiy deklaratsıyanı, siyasiy mabuslar meselesini, esirge alınğan deñizcilerniñ taqdirlerini, RF-nıñ AŞPA-ğa qaytuvını, Qırımtatar Milliy Meclis ve başqa qırımtatar teşkilâtları ile işbirlikni, tamır halqlar aqqında qanunnıñ qabul etilüvini muzakere etti.

Anton Korınevıç qırımtatarlar Ukrainanıñ tamır halqı olğanını qayd etip, bu meseleniñ uquqiy ceetten uyğulanuvı ile işğal etilgen Qırımda insan aqlarınıñ qorçalanuvı Temsilcilikniñ faaliyetinde esas yer alacağını vade etti.

Bundan ğayrı, Daimiy Temsilci gençlerni Temsilcilikniñ vekâletleri ve olarnı kelecekte yerine ketirüv ile tanıştırdı. Qırım Muhtar Cumhuriyetiniñ işğalden azat etilüvi ve ğayrıdan integratsiyası boyunca Strategiyanı inkişaf etüv Temsilcilikniñ muim yönelişlerinden biri olğanını da qayd etti.