Arman ayınıñ 23-de Kıyiv şeerinde Ukraina Prezidentiniñ Qırım MC-deki Temsilciligi terkibinde çalışqan Qırım platforması Ofisi açıldı

İşte, Ofis ve onıñ vazifeleri aqqında tafsilâtlıca ikâye etmege isteymiz.

Qırım platformasınıñ qurulış sammitinde Ukraina Prezidenti Volodımır Zelenskıy şunı qayd etken edi: ”Biz bu Sammitni, tek adı olsun dep keçirmeymiz. Qırım mevzusı halqara kün tertibinden kelecek yedi yıl devamında da yoq olmamalı. Onıñ içün biz, endiden başlap, ameliy faaliyetnen ve pek muayyen meseleler etrafında ğayretlerimizniñ yönetüvinen oğraşmalımız. Faaliyetimizni devam ettirmek maqsadınen Qırım platforması Ofisi meydanğa ketirildi”.

Devletimizniñ başlığı qayd etkeni kibi, Qırım platformasınıñ içki treki Ukraina devlet akimiyet organlarını, ecnebiy devletlerni, halqara teşkilâtlarnı ve Qırımda yaşağan Ukraina vatandaşlarını yönetüv ve aralarında bağ tutuv içün hızmet etecek bir meydançıq olaraq hızmet etecek Qırım platforması ofisi şeklinde devam ete.

Ofisniñ esas vazifeleri Qırım platforması çerçivesinde amelge keçirilgen tedbir ve leyhalarğa ekspert, konsultativ, haber ve başqa qol tutuvnı berüvdir.

Bundan ğayrı, Kıyivdeki ”Qırım habı” vazifesini becergen Ofis avuştırılğan çeşit türlü Qırım akimiyet organlarınıñ, Ekspertler ağı azalarınıñ ğayretlerini birleştirüv, beraberlikte vatandaşlarnı qabul etüv, yerli ve halqara ekspertlerniñ iştiragi ile Qırımnı işğalden azat etüv ve ğayrıdan integratsiya etüvge bağışlanğan tedbirlerni keçirüv içün hızmet etecektir.

Qırım platforması Ofisiniñ teşkil etilmesine Temsilciliknen işbirlikte devletimizge bularnıñ episini amelge keçirmege yardım etken ortaqlarımız qol tuttı. Azırlav ceryanınıñ çeşit türlü basamaqlarında bizge müim qol tutuv köstergen İnsan aqları boyunca Ukraina-Helsinki birligi, Qırım SOS cemaat teşkilâtı, International Partnership for Human Rights (IPHR) – (İnsan aqları oğrundaki halqara ortaqlıq (Belçika), ”Renaissance” halqara fondu ve Taras Şevçenko adına Kıyiv milliy universitetine minnetdarlığımıznı bildiremiz.