Oraq ayınıñ 21-de Ukraina Prezidenti Volodımır Zelenskıy 2021 senesi oraq ayınıñ 1-de Ukraina Yuqarı Şurası çoqluq olıp qabul etken ”Ukraina tamır halqları aqqında” 1616-IX sanlı qanunnı imzaladı

Qanun Ukraina tamır halqlarınıñ uquqiy mevamını tertipley ve Ukraina tamır halqlarından olğan şahıslarğa bütün insan aqlarına ve esas serbestliklerine tolu şekilde saip olacaqlarına dair kefaletler belgiley; tamır halqlarınıñ medeniy, informatsion ve başqa aqlarını, devlet ile munasebetler qurmaları içün lâzim olğan vastalarnı ve aletlerni, şu cümleden, olarnı temsil etken organlarnı maksimal derecede qorçalay.

Bu, qırımtatar halqı vekilleriniñ ve diger Ukraina tamır halqlarınıñ aq-uquqlarını ğayrıdan tiklev ve temin etüv oğrunda yapılıp, Vaqtınca işğal etilgen Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüv strategiyasını yerine ketirilmesini maqsat etip qoyğan ilk adımlarımızdan biridir.

Qanunğa binaen, ”Ukraina tamır halqı” – Ukraina topraqlarında şekillengen, özüne has til, medeniyet ve adetlerine, içtimaiy, medeniy ya da temsiliy organlarına saip olğan, özüni Ukrainanıñ tamır halqı olaraq qabul etken, eali arasında etnik azlıq olaraq sayılğan ve Ukraina sıñırı tışında öz devletçiligine saip olmağan avtohton etnik toplulıqtır.

Tamır halqlar Ukraina devleti terkibinde özüni belgilemek aqqına ve Ukraina Esas qanunı ve diger qanunları sıñırlarında siyasiy mevamğa maliktir. Olarnıñ ferdiy ve ortaq şekilde bütün insan aqlarına ve esas serbestliklerge saip olmaq aqları bardır. Ruhiy, diniy ve medeniy adet ve ananelerine riayet etüv, olarnı ğayrıdan tiklev, maddiy ve maddiy olmağan medeniy miraslarını qorçalav; diniy ve medeniy qıymetleri olğan yerleriniñ cedvelini belgilev; tarihiy toponimik adlarını qaytaruv; til, tarih, medeniyetiniñ ögrenilmesini temin etüv maqsadınen oquv yurtlarınen işbirlik aqlarına saipler.

Qanun Ukraina tamır halqlarınıñ etnik mensübiyetini ya da etnik özgünligini tanımamaqnı yasaq etmektedir.

Ukraina Prezidenti Volodımır Zelenskıy ile bu müim qanun üzerinde çalışqan er keske minnetdarlığımıznı bildiremiz. Qanunnıñ küçke kirmesi içün onıñ resmiy şekilde derc etilmesine bekleymiz ve amelge keçirilmesi üzerinde çalışmağa azırlanamız.