Kiçik aynıñ 17-si Qırımda Aqmescit, Bahçisaray, Qarasuvbazar, Aqyar şeerlerinde ve İçki rayonında bir sıra tintüv ve yaqalavlarnen başlandı

Vaqtınca işğal etilgen Qırım yarımadasında quvetçilerniñ qanunsız areketleri aqqında ilk haberler saba saat 4-ten kelip başladı.

Qırım birdemligi tintüvlerniñ aşağıdaki faallerde keçirilgenini haber etti:

Mahamadaminov Abdulboriy Mahamadin oğlı

  • Eyüpov Azamat
  • Yalkabov Tımur Mumin oğlu
  • Fedorov Oleg
  • İbragimov Ernest
  • Seydametov Lenur
  • Şihametov Yaşar

Yaqalanğanlar arasında Moskovadaki Qızıl meydanında keçirilgen narazlıq aktsiyasınıñ iştirakçisi Azamat Eyüpov ve Qırım balalığı teşebbüsiniñ faali Ernest İbragimov bardır.

Ukraina Prezidentiniñ Qırım MC-deki Temsilciligi Qırım Muhtar Cumhuriyeti ve Aqyar şeeri topraqlarında yalıñız siyasiy mevamları ve kütken dinleri içün vatandaşlarnı taqip etken Rusiye Federatsiyasınıñ cezalayıcı areketlerini takbih ete. Rusiye daa bir cenk cinayetini işledi, işğalciniñ esas maqsadı ise, Qırımda bir-de-bir qarşılıq kösterüv ve birdemlik areketlerini yoq etüvdir. Temsilcilik taqımı qanunsız siyasiy taqip etüv şekilinde işğalci memuriyetler tarafından yapılğan er bir adiseni qayd etip, malümatlarnı uquq qorçalav organlarına taqdim ete ve milliy ve halqara seviyelerdeki faaliyetinde işlete.