2020 senesi boş aynıñ 17-de Ukraina Prezidentiniñ Qırım MC-deki Daimiy Temsilcisi Anton Korınevıç Avropa Birliginiñ Ukranadaki Temsilciligi tarafından teşkil etilgen AB aza devletleriniñ elçileri ile körüşüvde iştirak etti. Tedbirde maruzalarınen Ukraina çetel işler Naziriniñ Birinci muavini Emine Caparova ve Qırımtatar Milliy Meclisiniñ reisi Refat Çubarov çıqışlarda bulundılar.

Anton Korınevıç öz çıqışında Rusiye Federatsiyası tarafından işğal etilgen Qırım yarımadasında insan aqlarınıñ bozuluvı saasında kerçek malümatnı taqdim etti.

”Siyasiy sebeplerden taqip etüv, Ukrainağa qol tutqan vatandaşlarımıznıñ yaqalanmasına ve olarnı aşırıcılıq ya da ekstremizmde qabaatlanğan siyasiy mabuslarğa çevirilmesine ketire. Al-azırda eñ azından 94 Ukraina vatandaşı, işğalci akimiyet tarafından yaqalanğan siyasiy mabuslardır. Olarnıñ ekseriyeti – qırımtatarlardır. Qırım, çeşit türlü bozuluvlar mümkün olğan ”kül rengindeki zonağa” çevirildi – vaqtınca işğal etilgen Qırımda gençler zorbalıqnen işğalciniñ ordusında hızmet etüvge çağırıla, işğalci Rusiye akimiyeti qırımtatar ve ukrain milliy mensübiyetini silmege tırışa, ukrain kilisesi taqip etilip, yoq etilmektedir”, – dep haber etti Daimiy Temsilci.
COVİD-19 salğını ile bağlı olğan çağıruvlarğa çıqışta ayrıca diqqat etilgen edi. Vaqtınca işğal etilgen Qırımdaki vaziyet felâketke yaqın, işğalci Rusiye akimiyeti ise mesüliyetlerini yerine ketiremey, yerli sakinlerniñ canlarını ve sağlıqlarını qurtaramay. Hastahanelerde yer ve yataqlar yetişmey, vatandaşlarnı hastanelerge yatqızmaylar, hastalarnı tıbbiy yardımdan marum etip, hastahanelerden sanatoriylerge avuştıralar, bedava COVİD testini tapşırmaq imkânı yoq, acele yardım arabalarınıñ kelmesini kimerde 24 saatten ziyade beklemege kerek, ilâçhanelerde esas ilâçlar yoq, Qırımdaki COVİD-19 boyunca statistik malümatlar işğalci akimiyet tarafından deñiştirile, eali COVİD-19 telükeleri aqqında obyektiv malümat alıp olamay, cemaat yerlerinde ve adam çoq olğan yerlerde karantin tedbirlerine riayet etüv nezaret etilmey.
Ukraina Prezidentiniñ Qırım MC-deki Temsilciligi  Qırım meselesine diqqatlarını ayırğan ve Ukraina çetel işler Naziriniñ Birinci muavini Emine Caparova tarafından taqdim etilgen Qırım platformasında iştirak etüvnen meraqlanğan Avropa Birliginiñ devletlerini temsil etken diplomatlarğa öz minnetdarlığını bildire. Emine hanım öz çıqışında Avropa Birliginiñ aza devletlerini, keçirilmesi 2021 senesiniñ birinci yarımyıllığına planlaştırılğan Qırım platformasınıñ birinci sammitinde iştirak etmege davet etti.