2020 senesi saban (mart) ayı 17 künü «Maqsadı Ukraina topraqlarında (COVİD-19) koronavirus hastalığınıñ peyda olıp darqaluvına qarşılıq kösterüv olğan Ukraina qanuniy senetlerine deñişmeler kirsetüv aqqında» 530-IX sanlı Ukraina Qanunı aynı şu künü quvetini aldı

Qanun ile belgilengen meseleler:

Uquqiy mesüliyet

  • ”Ealini infektsion hastalıqlarından qorçalav aqqında” Ukraina qanunı, başqa qanuniy senetler ve infektsion hastalıqları ile küreş meselelerine dair öz-özüni idare etüv organlarınıñ qararları ile belgilengen sanitar-gigiyenik, sanitar-epidemik, insan karantini boyunca qaidelerni ve şartlarnı bozğan şahıslar memuriy mesüliyetke çekilecektir.

Ceza: Memuriy uquq bozuluvları aqqında Ukraina Kodeksiniñ 443 maddesine binaen vatandaşlar 1000-2000 qat minimal aylıq (17000 – 34000 grivnâ) miqdarında, memurlar 2000-10000 qat minimal aylıq (34000 – 170000 grivnâ) miqdarında para cezasına çekilecekler.

(devamını oqumaq içün, başlıqqa basıñız)

  • Epidemik ve diger infektsion hastalıqlarnıñ, em de bulaşıcı olmağan kütleviy (zeerlenüv) hastalıqlarnıñ ögüni aluv ve olarnen küreşüv maqsadınen belgilengen qaidelerni ve şartlarnı bozıp, neticede bu hastalıqlarnıñ darqatılmasına yol bergen, ya da bere bilecek areketler yapqan şahıslarğa qarşı cinaiy mesüliyet quvetleştirildi.

Ceza: Cınaiy bozuluvları aqqında Ukraina Kodeksiniñ 325 maddesine binaen qanun bozucısı 1000-3000 qat minimal aylıq (17000 – 51000 grivnâ) miqdarında para cezasına çekilecek, ya da 6 ayğa qadar apiske alınacaq, ya da serbestligi 3 yılğa qadar sıñırlanacaq, ya da 3 yılğa qadar azatlıqtan marum etilecektir.

Tıb

  • koronavirus hastalığı ile küreş içün kerekli mal ile hızmetlerni aluv ceryanı qolaylaştırıldı; işbu maqsat ile çetelden alınğan tedaviy malzemeler ve tıbbiy mallar italât bergisinden ve qoşma fiyat bergisinden boşatılacaqlar;
  • işbu mal, iş ve hızmetler içün 100% evelden tölev yapılacaq;
  • tedaviy malzemeler, tıbbiy mallar ve içtimaiy qıymeti yüksek olğan mallarnıñ fiyatları Ükümet tarafından nezaret etilecektir.

 

Emek munasebetleri, devlet hızmeti, meşğullik

(COVİD-19) koronavirus hastalığınıñ darqaluvına qarşılıq kösterüv olaraq yapılğan karantin ya da sıñırlayıcı tedbirler deviri devamında:

  • iş bericisi işçisine, bu cümleden, devlet hızmetçisine, öz-özüni idare etüv müessisesiniñ hadimine emek añlaşmasında beyan etilgen vazifelerini belli bir müddet devamında evinde ettire bile, bundan ğayrı razılığını bergen işçisini, bu cümleden, devlet hızmetçisini, öz-özüni idare etüv müessisesiniñ hadimini ev tatiline yibere bile;
  • şirket, müessise, teşkilât saibi, ya da vekâletli şahıs idarelerniñ, şirketlerniñ, müessiselerniñ, teşkilâtlarnıñ iş cedvellerini ve bu cümleden fizikiy ve uquqiy şahıslarnı qabul etüv şartlarını deñiştire bile. Böyle deñişmeler aqqında eali İnternet saifeleri ve başqa alâqa usulları vastasınen haberdar etilmeli;
  • aylıqsız tatilde bulunuv müddeti Emek aqqında Ukraina qanunları kodeksi 84 maddesiniñ ekinci qısımına ve ”Tatil aqqında” Ukraina qanunı 26 maddesiniñ birinci qısımına binaen belgilengen umumiy müddetke qoşulmay;
  • işsiz qalğan şahısnı qayd etüvge ve işsiz statusını almaq niyetinen ariza bergen şahısqa işsizligi sebebinden maddiy yardım berüvge dair uquqiy-normativ senetlerni qabul etüv Ükümet tarafından temin etilecek.

 

2020 senesi deklaratsiyalar kampaniyası

  • Devlet ya da yerli öz-özüni idare etüv vazifelerini becermege tayinlengen şahıslar ”Qaparcılıqqa qarşılıq kösterüv” Ukraina qanunınıñ 45 maddesine binaen keçken senege dair deklaratsiyalarını 2020 senesi çiçek (aprel) ayı 1 kününe qadar degil de, 2020 senesi ilk yaz (iyün) ayı 1 kününe qadar taqim etmeliler. 2020 senesi ilk yaz ayı 1 kününece yaşağan yerlerinde karantin-sıñırlayıcı tedbirlerden sebep öz beyannamelerini beralmağan ya da mal-mülk saipligi ceetinden vaziyetleri bayağı deñişkeni aqqında haber etemegen şahıslar işbu beyannamelerini ya da haberlerini vaqıtında bermegenleri içün mesüliyetke çekilmeycekler.

 

Memleket içinde köçken şahıslarnıñ aq-uquqlarını temin etüv

(COVİD-19) koronavirus hastalığınıñ darqatıluvınen bağlı sıñırlayıcı tedbirler, ya da karantin deviri devamında ve onıñ lâğu etilmesinden soñ 30 kün devamında:

  • uzun vaqıt (60 künden ziyade) devamında yaşağan yerinde yoq olğanını ve evelki yaşağan yerine qaytqanını tahmin etip, memleket içinde köçken şahısnıñ malümat kâğıtınıñ aqiqiyligini lâğu etüv;
  • ”Ukraina devlet oşçadbank” halq öğündeki aktsioner cemiyeti tarafından memleket içinde köçken şahıs fizikiy teşkerüvden keçmegeni sebebinden onıñ cari bank esabından para masraflarını toqtatuv;
  • memleket içinde köçken şahıslarnı aqiqatta yaşağan/bulunğan yerleri boyunca nezaret etip, içtimaiy tölevlerni kerçekleştirüv yasaq etile.

 

Memuriy hızmetler

  • Karantin ilân etilgen kününden başlap, qanunğa binaen memuriy ve başqa hızmetlerge muracaat etüv müddetlerge ve işbu hızmetlerni yerine ketirüv müddetlerine riayet etüv toqtatıla. Karantin toqtatılğan soñ, işbu müddetlerniñ ketişatı karantinden evel olğan vaqıtqa köre devam etecek.

 

Mesken-kommunal hızmetler

(COVİD-19) koronavirus hastalığınıñ darqatıluvınen bağlı sıñırlayıcı tedbirler, ya da karantin devirinde ve onıñ lâğu etilmesinden soñ 30 kün devamında:

  • mesken-kommunal hızmetler içün vaqıtında yapılmağan para cezasınıñ esaplanması ve talap etilmesi;
  • mesken-kommunal hızmetleri içün vaqıtında ya da tolu kölemde tölemegen Ukraina vatandaşlarını işbu hızmetlerden marum etüv;
  • mahkeme qararlarını zorbalıqnen yerine ketirüv çerçivesinde mesken-kommunal hızmetleri içün borçları olğanı sebebinden Ukraina vatandaşlarına şahsiy mülk olaraq ait olğan meskenden olarnı zorbalıqnen sürgün etüv, ya da marum etüv;
  • mesken-kommunal hızmetleri içün vaqıtında tölemegenleri sebebinden vatandaşlarnı zorbalıqnen devlet, cemaat ve içtimaiy fondlarına ait olğan evlerdeki meskenlerden zorbalıqnen sürgün etüv yasaq etile;
  • Ükümet, normativ-uquqiy senetlerni qabul etilüvini ve karantin ile bağlı içtimaiy munasebetlerni doğrultmaq, bu cümleden (COVİD-19) koronavirus hastalığınıñ darqatıluvınen bağlı sıñırlayıcı tedbirler, ya da karantin deviri devamında mesken subsidiyalarnıñ toqtatıluvına yol bermemek, mesken subsidiyalarnı alğan şahıslarnıñ cedvelini kenişletmek ve evelki devirde subsidiyalar alğan horantalarğa olardan arizalar beklemeden kelecek devirde subsidiyalarnı berdirmek içün lâzim olğan qanun leyhalarnı Ukraina Yuqarı Şurası tarafından baqılmasını temin etecek.

 

Yabancılar ve vatandaşlıqları olmağan şahıslar

(COVİD-19) koronavirus hastalığınıñ darqaluvına qarşılıq kösterüv olaraq yapılğan karantin ya da sıñırlayıcı tedbirler deviri devamında:

  • Karantin başlatılğanı sebebinden Ukraina sıñırlarını vaqıtında terk etemegen, ya da Ukraina topraqlarında bulunma müddetlerini uzatılmasına, ya da vaqtınca\daimiy şekilde yaşağanları aqqında malümat kağıtlarınıñ deñiştirilüvine dair Ukraina devlet migratsiya hızmetiniñ yerli organlarına\bölüklerine arizalarını berip olamağan yabancılar ve vatandaşlıqları olmağan şahıslar memuriy mesüliyetke çekilmeycekler. Şahsiyetni, Ukraina vatandaşlığını, ya da şahısnıñ mahsus vaziyetini tasdıqlağan vesiqalar karantin deviri devamında şahıs muracaat etken yerde resmiyleştirile;
  • Ukraina Nazirler Şurası qaçaq statusını alğan, mahsus qorçalav altında bulunğan, ya da işbu statuslarnıñ berilmesini beklegen yabancılar ve vatandaşlıqları olmağan şahıslar, bundan ğayrı Ukraina topraqlarında qanunsız alda bulunğan ve mahkeme qararına binaen karantin altındaki topraqlarda vaqtınca yerleştirüv noqtalarında yerleştirilecek yabancılar içün mütenasip yerleşüv yerlerniñ cedvelini azırlay.

 

Devlet nezareti ve mecburiyetlerni yerine ketirüv

  • (COVİD-19) koronavirus hastalığınıñ darqaluvına qarşılıq kösterüv olaraq yapılğan karantin ya da sıñırlayıcı tedbirler deviri devamında devlet nezareti (közetüvi) organlarına hocalıq faaliyet saasında devlet nezareti (közetüvi) boyunca planlaştırılğan tedbirlerniñ keçirilmesi yasaq etile.

Ükümet normativ-uquqiy senetlerniñ qabul etilüvini ve Ukraina Yuqarı Şurasına karantin deviri devamında ipoteka vastasınen temin etilgen esas mecburiyetni yerine ketirüv boyunborcunıñ toqtatıluvı ile ipoteka maddesinin tutılıp alınmaması içün lâzim olğan qanun leyhalarnı taqdim etilüvini temin etecektir.