Ukraina Prezidentiniñ Qırım MC Temsilciligi aq qorçalayıcılarnen beraber Qırım sakinleri içün subet botunı taqdim etti

Ukraina Prezidentiniñ Qırım MC Temsilciligi ”Qırım-SOS” aq qorçalav teşkilâtı ve insan aqları boyunca Ukraina-Helsinki birligi ile beraber Telegram içtimaiy ağında çalışqan CrimeaIsUAbot (t.me/CrimeaIsUaBot) subet botunı taqdim etti. İşbu vasta vaqtınca işğal etilgen Qırım yarımadasında yaşağan Ukraina vatandaşlar içün yaratılğandır. Onıñ yardımınen eñ çoq soralğan suallerge umumiy cevap almaq mümkündir.

“Ukraina Prezidentiniñ Qırım MC Temsilciligi aq qorçalayıcılarnen beraber Qırım sakinleri içün subet botunı taqdim etti”





Teşkil etilüviniñ 29-ncı yıllığı munasebetinen Ukraina Prezidentiniñ Qırım MC-deki Temsilciligi ile matbuat sabalığı

Matbuat vastalarınıñ vekillerini ve blogerlerni Ukraina Prezidentiniñ Qırım Muhtar Cumhuriyetindeki Temsilciligi / Qırım Platforması Ofisi taqımı ile matbuat sabalığına davet etemiz.

2021 senesi ilk qış ayınıñ 17-de saat 10:00-da

Adresimiz: Ukraina Prezidentiniñ Qırım Muhtar Cumhuriyetindeki Temsilciligi /

Qırım Platforması Ofisi

Mıhaylo Gruşevskıy soqağı, 24/2

Maqsadımız: 2021 senesindeki faaliyetimizniñ neticeleri ile paylaşmaq, 2022 senesine planlarımıznı tarif etmek. Er kün işğalden azat etüv strategiyasını ve Qırım platforması çerçivesindeki teşebbüslerni amelge keçirüv üzerinde çalışqan taqımnen tanıştırmaq.

Muzakere etilecek esas mevzular:

  • 1992 senesi ilk qış ayınıñ 17-de teşkil etilgen Temsilcilikniñ faaliyeti.
  • Temsilcilikniñ ve onıñ terkibindeki bölükniñ -Qırım platforması Ofisiniñ ve işğalden azat etüv ve ğayrıdan integratsiya etüv meseleleri boyunca bölük taqımınıñ faaliyetlerindeki yönelişler
  • Qırım Platforması Ofisiniñ qanun yaratıcılıq teşebbüsleri ve leyhaları
  • Soñunda – muzakere etüv ve jurnalistlerniñ suallerine cevap berüv.

Lütfen, matbuat sabalığımızğa google-qalıbı vastasınen aşağıdaki bağlantı boyunca qayd etiliñiz: https://forms.gle/wxw2u4uAcyuEgPjH8.

  • Ukraina Prezidentiniñ Qırım Muhtar Cumhuriyetindeki Temsilciligi – maqsadı Ukraina Prezidenti üstüne yüklengen vekâletlerniñ yerine ketirilmesini qolaylaştırmaq olğan devlet müessisesidir. Temsilcilikniñ faaliyeti halq ögünde açıqtır.
  • Qırım platforması – Qırım meselesini kün tertibine qaytarmaq, Qırımda insan aqlarını qorçalamaq, yarımadanıñ işğalden azat etilmesini qolaylaştırmaq, Avropada ve bütün dünyadaki havfsızlıqnı qaviyleştirmek maqsadınen Ukraina tarafından teşkil etilgen halqara yönetici vastadır.

 

Qoşma malümat içün muracaat etilecek şahıs: 

Alina Karban

+ 38 (097) 177 09 39 

alinakarban@gmail.com.

#QırımUkrainadır #UkrainaPrezidentiniñQırımMCTemsilcilgi #QırımPlatforması #CrimeaPlatform #Ukraina #Ukraine #Qırım #Crime


Ukraina Prezidentiniñ Qırım Muhtar Cumhuriyetindeki Temsilciligi / Qırım Platforması Ofisine boş aynıñ 26-da Taras Şevçenko adına Kıyiv milliy universitetiniñ rektorı Volodımır Bugrov öz taqımınen ve Ukraina çetel işler Naziriniñ Birinci muavini Emine Ceppar teşrif buyurdılar

Körüşüv esnasında Ukraina Prezidentiniñ Qırım MC-deki Daimiy Temsilcisi Anton Korınevıç musafirlerni Temsilcilikniñ ve Qırım Platformasınıñ faaliyetinen tanıştırdı.

Taraflar beraberlikte tasil saasında kelecekteki leyhalarnı, şu cümleden, vaqtınca işğal etilgen Qırım Muhtar Cumhuriyetinden kelme mezunlarnen bağlı meselelerni muzakere ettiler.

Vaqtınca işğal etilgen topraqlarda yaşağan ukrain gençlerine qol tutqan ve lâqayd qalmağan zenaatdaşlarımızğa minnetdarlığımıznı bildiremiz.

#QırımUkrainadır #UkrainaPrezidentiniñQırımMCTemsilcilgi #QırımPlatforması #CrimeaPlatform #Ukraina #Ukraine #Qırım #Crime


Anton Korınevıç ”Farqlı nesillerniñ vazifesi olaraq Donbastaki çatışuvnı aşuv: adaletke, dialogga ve barışuvğa teşviq etüv” halqara forumında iştirak etti

”Keçici devirdeki adalet, vaqtınca işğal etilgen topraqlarnı işğalden azat etüv ve ğayrıdan integratsiya etüvge dair devlet siyasetiniñ zaruriy unsırudur” – bu aqta Ukraina Prezidentiniñ Qırım MC-deki Daimiy Temsilcisi Anton Korınevıç ”Farqlı nesillerniñ vazifesi olaraq Donbastaki çatışuvnı aşuv: adaletke, dialogga ve barışuvğa teşviq etüv” mevzusında halqara forum esnasında ikâye etti.

Forum şarqıy Ukraina boyunca  CivilM+ Üçünci halqara forum çerçivesinde olıp keçti. Teşkilâtçılar: İnsan aqları boyunca Ukraina-Helsinki birligi.

Tedbirdeki körüşüvi esnasında Anton Korınevıç Rusiye Federatsıyasınıñ Ukrainağa qarşı sılâlı istilâsınıñ qurbanlarına kefaletlerini temin etüvge dair devlet siyasetiniñ temeli olaraq keçici devirdeki adaletniñ milliy şekline yanaşuvnı tarif etti. Keçici devirdeki adaletniñ yanaşuvlarını amelge keçirüv, normativ-uquqiy senetlerde, hususan Ukraina Prezidentiniñ Qırım Muhtar Cumhuriyetindeki Temsilciliginiñ faaliyeti aqqındaki Ukraina Prezidenti Fermanında onı pekitüv ve yanaşuvlarını bugünde-bugün devlet ve uquq qorçalav organları tarafından amelde işletüv müim olğanını qayd etti.

Cenkniñ sebepleri ve esas adiseleri aqqında hatırlavlarnen çalışuv, işğal şaraitlerinde eñ ağır cinayetlerni ve insan aqları bozuluvlarını nezaret etüv, cedvelge aluv ve taqiq etüv, keçici devirdeki adaletniñ müim vastaları, olar Ukraina Prezidenti Fermanı ile tasdıqlanğan Vaqtınca işğal etilgen Qırım MC ve Aqyar şeerini işğalden azat etüv ve ğayrıdan integratsiya etüvge dair stratetegiyada ve onı amelge keçirüv boyunca tedbirler planında aks etilgendir.


Vaqtınca işğal etilgen Qırım MC topraqlarında grajdan ealisine qarşı nevbetteki cezalavlar dalqası!

Qapsihor köyünde qırımtatar milliy areketiniñ veteranı, faal Rustem Üseyinovnıñ evi viran etildi.

Faal Rustem Üseyinovnıñ evini viran etüv, mülkiyet aqlarınıñ qaba şekilde bozuluvıdır.

Regional insan aqları merkeziniñ abulqatı Mıkola Kikkas izaatlağanı kibi, ”İşğalci akimiyetniñ areketlerini işğal ve mülkiyetni yoq etmege yasaq etken Halqara gumanitar uquq şartlarını bozuv ceetinden muzakere etmek kerek. Bu, Rusiye Federatsıyasınıñ nevbetteki arbiy cinayetidir”.

Üseyinovnıñ evi yoq etilgen soñ, lâqayd qalmağan qırımlılar onı öz evlerine yaşamağa çağıralar. Amma al-azırda hastahanede bulunğan Rustem Üseyinovnıñ özü jurnalistlerge Qapsihornı terk etmege niyeti olmağanını haber etti. Hastahaneden çıqqan soñ o, sabıq eviniñ yerinde çadır tiklep, anda ”ana toprağında yaşamaq aqqı içün küreşini devam ettirmege” niyetlene. Menba: Qırım Aqiqat

Bundan ğayrı, vaqtınca işğal etilgen yarımadada Rusiye quvetçileri boş aynıñ 23-de Aqmescitteki vaqtınca keçindirüv tevqifhanesiniñ binası yanına kelgen faallerni yaqaladı.
Olar 12 künlük memuriy apisten soñ çıqqan abulqat Edem Semedlâyevni qarşılap, oña qol tutmağa istegen ediler.

Quvetçiler 31 kişini yaqaladı, olardan 10 – qadındır. Yaqalanğan jurnalistlerniñ yanında press-kartları bar edi.

Abulqat Edem Semedlâyevniñ fikirince, qırımtatar faallerniñ yaqalanuvı, işğalci akimiyet insanlarnıñ narazlıqqa çıqqanlarını ve öz yaqınlarına qol tutqanlarını begenmegeninen bağlıdır.

Ukraina Prezidentiniñ Qırım Muhtar Cumhuriyetindeki Temsilciligi işğalci akimiyetniñ areketlerini qattı sürette taqbih ete ve insanlarğa qarşı cezalavlarını toqtatmağa çağıra!

#QırımUkrainadır #UkrainaPrezidentiniñQırımMCTemsilcilgi #QırımPlatforması #CrimeaPlatform #Ukraina #Ukraine #Qırım #Crime 


Hatıra çırağını yaq – Golodomor soyqırımınıñ qurbanlarını añ!

Boş aynıñ dörtünci cumaertesi kününde Ukraina açlıqnen öldürilgen ukrainalılarnıñ cemisini aña.
Bu, kommunistik tertibiniñ insaniyetke qarşı deşetli cinayeti ve memleketimizniñ faciasıdır.

Bugün, saat 16:00-da, umummilliy sükünet daqqası ilân etilecek, bundan soñ Ukrainanıñ er yerinde ”Çıraqnı yaq” tedbiri keçirilecek.

Bu künü iç bir pencere yalıñız qalmamalı. Öz pencereñizde hatıra çırağını yaqıñız. Aqşam qaranlığında bu kiçik alevçikler qorqunçlı cezalavlarnı hatırlağan ukrainalılarnıñ közlerini añdıracaq.

Soyqırım cinayetiniñ iç bir vaqıt tekrarlanmaması içün, biz Golodomor aqqında bilmelimiz!

Mustaqillik oğrundaki küreşniñ fiyatını bilgen küçlü millet olmamız içün, Golodomor aqqında hatırlamalımız!

Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavini Tamila Taşeva qayd etkeni kibi, ”Menim nesilim, NKVD ukrain köylerinde ve şeerlerinde qıtlıq ile cezalavlarını başlatqan soñ, NKVD sıñırlarından mücizeli şekilde keçip, açlıqtan mecalsız alda Qırımda peyda olğan ve qurtulış qıdırğan qıta sakinleri aqqında ana-babalarımıznıñ çoqtan-çoq ikâyelerini hatırlay. Bu qorantalardan birini menim qorantam qurtardı, pek çoq insan başqa qırımtatar qorantalarına sığanaq taptı”.

Ukraina Prezidentiniñ Qırım Muhtar Cumhuriyetindeki Temsilciligi umummilliy añuv tedbirlerine qoşula ve beraberlikte evleriñizniñ pencerelerinde, ya da mesken yerleriñizdeki Golodomor qurbanlarını hatırlav taşları yanında çıraqlar yaqmağa davet ete.

Biz hatırlaymız! Biz küçlümiz!

#QırımUkrainadır #UkrainaPrezidentiniñQırımMCTemsilcilgi #QırımPlatforması #CrimeaPlatform #Ukraina #Ukraine #Qırım #Crime


Akimiyet organları vekilleriniñ ve Qırım platforması Ofisiniñ Qırım platformasınıñ halqara Ekspertleri ağınıñ tanımama siyaseti ve sanktsiyalar boyunca taqımnıñ ekspertleri ile körüşüvi

Ukraina Prezidentiniñ Qırım Muhtar Cumhuriyetindeki Temsilciliginde akimiyet organları vekilleriniñ ve Qırım platforması Ofisiniñ Qırım platformasınıñ halqara Ekspertleri ağınıñ tanımama siyaseti ve sanktsiyalar boyunca taqımnıñ ekspertleri ile körüşüv olıp keçti.

Körüşüvniñ maqsadı:

🔳 akimiyet organları vekillerini Qırım platformasınıñ halqara Ekspertleri ağınıñ tanımama siyaseti ve sanktsiyalar boyunca taqımı ile tanıştırmaq
🔳 Ukraina devletiniñ sanktsion siyasetini islâat etüv, Ukraina milliy sanktsiyalarını halqara ortaqlarımıznıñ sanktiyalarınen aynı vaqıtta amelge keçirüv meselesinde problemli noqtalar, devlet ve cemaat sektorları arasında yañı sanktsion paketlerini şekillendirüvge dair uyğunlaştıruv vastalarnı işlep çıqaruv saalarında al-azırdaki vaziyet boyunca ekspertlerniñ planları, faaliyetleri ve tevsiyeleri aqqında ikâye etmek.
🔳 aktual haberlernen paylaşmaq. 

🔳 RF-nıñ Ukrainağa qarşı tecavuzı ve Qırım MC ile Aqyar şeerini ilhaq etüv teşebbüsi munasebetinen amelge keçirilgen sanktiyalarnıñ semereligini arttıruv ve sanktsion siyasetini islâat etüv boyunca işbirlik aqqında añlaşmaq.

Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç böyle yekün çekti:

”Bugün beraberlikte yapqan bütün areketlerimiz, Qırımnıñ işğalden azat etilüvine hızmet etecek qararlarğa çevirilmeli”.

Körüşüvde Ukraina Çetel işler Nazirliginiñ sanktsion siyaseti meseleleri boyunca mahsus vekili Oleksiy Makeyev, Vaqtınca işğal etilgen Ukraina topraqlarını ğayrıdan integratsiya etüv meseleleri boyunca nazir muavini İgor Yaremenko, Qırım MC ve Aqyar şeeri Prokuraturasınıñ reber muavini Nariman Suleymanov, Ukraina halq deputatları Yuliya Klımenko ve Vadım Galaçuk, Vaqtınca işğal etilgen Ukraina topraqlarını ğayrıdan integratsiya etüv meseleleri boyunca Nazirlikniñ, Ukraina çetel işler Nazirligindeki Siyasiy direktoratnıñ, aq qorçalayıcı teşkilâtlarınıñ vekilleri ve saire iştirak etti.

#QırımUkrainadır #UkrainaPrezidentiniñQırımMCTemsilcilgi #QırımPlatforması #CrimeaPlatform #Ukraina #Ukraine #Qırım #Crime